უცნაურობაზე მსურდა საუბარი, მაგრამ გადავდებ.

ახლა წავალ და დავიძინებ, და რომ გავიღვიძებ მერე გავაგრძელებ.

უცნაურად ვიქცევი? - შენდობას გთხოვთ, მაპატიეთ!
მთავარია ცუდად არ მოვიქცე.

უცნაურობიდან ცუდად მოქცევამდე ერთი ნაბიჯია.

სუბიექტურობამ შეიძლება მცდარი აზრი დაგიტოვოს, ობიექტურობაა აუცილებელი.

ოთხმოციანების ბოლოს, ჩემი ძმაკაცი საკუთარ ქორწილში რეზინის კედებით იყო მისული, თეთრი „ექსპერიმენტები“ ეცვა - ერთი შეხედვით უცნაური იყო.

სუფრაზე, ქორწილში, სიმამრს წამდაუწუმ მისი კედებისკენ გაურბოდა თვალი. ბოლოს ვერ მოითმინა და მკაცრად გაგვკიცხა ყველა: - სირცხვილი და მოწიწება დაჰკარგეთ ახალგაზრდებმა!
აბა რა იცოდა პატივცემულმა, რომ ფეხები ატკინა სიძეს ახალმა „ინსპექტორებმა“, ქუსლები გადაატყავა და მაგიტომაც ჩაიცვა სახელდახელოდ ნაყიდი ჩინური კედები. 

ერთხელაც ვითხოვ შენდობას, განვმეორდები: უცნაურობიდან ცუდად მოქცევამდე ერთი ნაბიჯია. სიმართლის დასადგენად ობიექტურობაა საჭირო. ობიექტურობისთვის კი, ინფორმაცია.

რა ლამაზი იქნებოდა ყველაფერი, პოლიტიკა და ომი რომ არ არსებობდეს.

Pink Floyd...

უცნაურობას მიზეზი აქვს, სხვანაირად არ არსებობს, მაშინ უცნაურობა კი არა, სიბეცე და სიგიჟე იქნებოდა.

მაგალითად, უცნაურია, მაგრამ ორჯერ ბოდიშის მოხდა არ შეიძლება!„ზედიზედ ნათხოვნ პატიებას, ბოროტიც თან მოჰყვებაო“! გფარავდეთ უფალი.

P.S. უცნაურია ჩვენი ხელისუფალის მხრიდან ოლიმპიური სიმშვიდის შენარჩუნება, როდესაც პლანეტას დენთის სუნი ასდის. ცუდი კი არაა, უბრალოდ უცნაურია. რამდენჯერაც არ ვეომეთ რუსეთს, იმდენჯერ წავაგეთ, ჩვენ რაგბში ვუგებთ, ისინი ომს გვიგებენ.არადა, რა გინდა? - უშიშროების ორი საბჭო გვყავს. ჰოდა, ცოტა უცნაური კითხვა მაქვს: სომხეთის სახელმწიფოსგან თუ გვაქვს რაიმე გარანტია, რომ მისი ტერიტორიიდან კვლავაც არ შემოგვიტევენ ბომბდამშენები? თუ მერე კვლავ მოიბოდიშებენ?

P.P.S. რა ლამაზი იქნებოდა ყველაფერი, პოლიტიკა და ომი რომ არ არსებობდეს.

მარტინ ლუთერ კინგი:
„თუ ადამიანმა არ იცის რისთვის მოკვდებოდა, ის არც სიცოცხლის ღირსია“.
ამ შეკითხვაზე პასუხი შეიძლება კაცობრიობის უმეტესობამ ვერ გასცეს. ან სიკვდილის წინ, ორი წამით ადრე უპასუხოს მას,
და რა - არ არიან სიცოცხლის ღირსნი?! ძალზედ მომთხოვნია კინგი, თორემ იდეაში სწორია: - თუ არ იცი სიკვდილის ფასი, ესე იგი სიცოცხლესაც ვერ შეაფასებ...

დეზმონდ ტუტუ:
„ჰოლოკოსტი არ აძლევს იმის უფლებას ებრაელებს, რომ მშვიდობიანი პალესტინელები დახოცონ“.

სუბიექტურად ნათქვამია და ტოვებს შთაბეჭდილებას, რომ ნობელის პრემიის ლაურიანტს ებრაელების დატუქსვა განუზრახავს. თორემ სინამდვილეში ებრაელები პალესტი ნელებს ჰოლოკოსტამდეც ხოცავდნენ, „ათასი წლებით“ ადრე და არც პალესტინელები აკლებდნენ მშვიდობიან ებრაელებს ხოცვა-ჟლეტას.
 

მაჰათმა განდი:
„მე მომწონს ქრისტე, მაგრამ არ მომწონს ქრისტიანები, ისინი საერთოდ არ ჰგვანან მას“.

მიუხედავად ჩემი უდიდესი პატივისცემისა განდის მიმართ, ინდოელი პოლიტიკოსი და საზოგადო მოღვაწე ერთმნიშვნელოვნად ვერ ითავისებს იმას, რომ იესო ღმერთია, სამყაროს შემოქმედი და მასთან მსგავსებაც იმდენადვე რთულია, რამდენადაც შეუძლებელი. 

მაგრამ ჭიჭკიტიასი არ იყოს, მოიძებნებიან ადამიანები, რომლებსაც იესო მეგობრებად თვლის და ისინი, რა თქმა უნდა, ჰგვანან თავის მეგობარს.

უცნაურია?

ვინმე იტყვის, რომ უფლის მეგობრობა უცნაური მოვლენა არ არის?

ლეონარდო და ვინჩი:

„ვაზს ეცოტავა თავისი მხარე, მესერზე გადავიდა, ქუჩის მიღმა მოეჭიდა სხვა ღობეს... და მაშინ გამვლელებმა იგი გადაჭრეს“.

იცოდე შენი ადგილი!ზედმეტად თავს ნუ გამოიდებ და არ გამასხარავდებიო! რატომღაც რუსეთზე და ყირიმზე გავიფიქრე...

წმ.ღირსი მამა გაბრიელ აღმსარებელი-სალოსი:

„ჯერ უგუნური უნდა იყო, რომ მერე ბრძენი გახდეო“!

მეც მანდა ვარ: ბოროტება რომ ამხილო, ჯერ სიკეთეს უნდა იცნობდე! 

რა ლამაზი იქნებოდა ყველაფერი, პოლიტიკა და ომი რომ არ არსებობდეს.

Pink Floyd...

ევროპის აღმოსავლეთში განვითარებულ მოვლენებსაც მინდა შევეხო.

ფაქტია, „დასავლეთი“ მოკავშირეებს ეძებს, სამხედრო-ეკონომიკური გაძლიერება და მასთან ერთად რუსეთის დასუსტება სურს, ჩვენც და უკრაინასაც მაგ მოტივით გვპატიჟებს თავის რიგებში.