თქვენ თუ არასოდეს გსმენიათ ფრაზები - „ხმარებაში გაიწევს“ ან „მოჯდება თავისით“ გამოდის, რომ ტანსაცმლის ქართულ ბაზრობებზე არასოდეს ყოფილხართ და წარმოდგენა არ გაქვთ ამ უნიკალურ გამოთქმა-მეთოდებზე, რომლებიც მნიშვნელოვანწილად განაპირობებენ წარმატებას ტანსაცმლითა და ფეხსაცმლით ვაჭრობაში.
ამ ფრაზების კიდევ ერთხელ მოსასმენად და კიდევ იმის გასარკვევადაც, თუ ზოგადად რა მდგომარეობაა ტანსაცმლის ქართულ ბაზრობებზე ზამთრობით, არ შევუშინდი ქარსა და თოვლს და, ჩემი ერთი მეგობრის თანხლებით, დიდუბის ბაზრობისკენ გავწიე (თუ მან გასწია ჩემი თანხლებით... თუმცა რა მნიშვნელობა აქვს). თქვენ ისე ნუ გაიგებთ, თითქოს მე ბაზრებში ხეტიალი მეხალისება, მით უმეტეს წინა პოსტიც რაღაცნაირად ბაზარს ეხებოდა, უბრალოდ დავალება იყო ასეთი.

სხვათა შორის, მე პირველად ვიხილე დიდუბის ბაზრის დიდებულება, ამიტომაც ცდა არ დამიკლია დავალების კარგად შესრულებისთვის და ყველაფერს კარგად, გულისყურით დავაკვირდი, ხოლო მოვისმინე საკუთარი ყურით. პირველი, რაც თვალში მომხვდა, დახლების სიმჭდროვეა. საერთოდ, ტანსაცმლის ბაზრობებზე დახლების „კომპაქტურად ჩასახლება“ ჩვეულებრივი მოვლენაა, მაგრამ, შეიძლება ითქვას, დიდუბის ტანსაცმლის ბაზრობა ამ მხრივ „ხელოვნების ნიმუშს“ წარმოადგენს. დახლებს შორის  ვიწრო გასავლელიც კი  რამდენიმე ადგილას ტანსაცმლის საკიდებითაა გადახერგილი. პირველი რაც თავში მომხვდა - რკინის სქელი მავთულია, რომელზეც გადაჭიმული თხელი ცელოფანიც სახურავის მოვალეობას ასრულებს და რომელიც იმდენად დაბალია, რომ მუდმივად ყურადღებით ყოფნაა საჭირო, რათა აქა-იქ გამოშვერილ ბოლოებს არ დაეჯახოთ. ზოგიერთ ადგილას ის ზემოთ ნახსენები ცელოფანი, რომელიც, სხვათა შორის, მთლიანად არ ფარავს დახლებს - ჩამოწეულია, იქ წყალია ჩამდგარი და მონოტონურად წვეთავს (ხანდახან ამ ჩამოწეულ ცელოფანს ხელს აარტყავენ ხოლმე და მეზობელს წუწავენ)...
ერთი სიტყვით, ყველა პირობაა შექმნილი 

კიდევ ერთი სამუშაო დღის ხალისიანად გასატარებლად.
მთლიანად დიდუბის ბაზრობა (ტანსაცმელი, სურსათი) საკმაოდ დიდი ტერიტორიისაა და გარეთ ხალხიც საკამოდ ტრიალებს, მაგრამ რაც უფრო შიგნით შევდივარ, ნელ-ნელა მოვაჭრეები კლიენტების რიცხობრივად გადაჭარბებას იწყებენ. დრო და დრო ვჩერდები და ფასებს ვკითხულობ:-ყველანაირი ფასის გვაქვს - მპასუხობენ გაზეპირებული ფრაზით ყველგან. დაზუსტებით კი, საშუალო ციფრი, რომელიც ტანსაცმელზეც და ფეხსაცმელზეც ერთნაირად ვრცელდება, 30-დან 50-მდე მერყეობს (სხვათა შორის, უნდა აღვნიშნო რომ საკმაოდ დაბალი ფასები აქვთ).-დიდუბის ბაზრობაზე ყველაზე დაბალი ფასებია - მეუბნება შეციებული ლაურა ხიზანიშვილი - აქ ხალხი ძირითადად რაიონებიდან ჩამოდის, გაჭირვებულები არიან და იძულებული ვართ სხვა ბაზრობებთან შედარებით საქონელი დაბალ ფასში გავყიდოთ, პურის ფულს ვაკეთებთ მარტო. როდესაც ბაზრის პირობებით ვინტერესდები, ირკვევა რომ ერთ გამყიდველს, რომელსაც 1 კვმ ფართი უკავია, ყოველდღე 4 ლარის გადახდა უწევს, ამას ემატება საკნისა (საქონლის შესანახი ადგილი) და ტრანსპორტის გადასახადიც, რაც, ჯამში, დაახლოებით 190 ლარი გამოდის ყოველთვიურად.
 

14.12.2013