ქართული ვებრესურსების განვითარების კომპნია

mebloge.com  ერთი წლისაა. შარშან, მისი პირველი გამოშვება ჩვენ საგანგებოდ დავამთხვიეთ 27 სექტემბერს, სოხუმის დაცემის დღეს, და ამით გვუსრდა ხაზი გაგვესვა - მიუხედავად არაკეთილმოსურნეთა გამუდმებული მცდელობებისა, საქართველო თავისუფალია და ქართველი ხალხი, თუმცა კი წინააღმდეგობებით აღსავსედ, მაგრამ მაინც აშენებს თავისუფალი ადამიანების თავისუფალ სახელმწიფოს (პირველი გამოშვების სარედაქციო წერილი იხილეთ აქ).
ჩვენ გვჯერა, რომ ეს პორტალი ამის ერთი პატარა გამოხატულებაა. ჩვენ იგი ჩავიფიქრეთ, როგორც სიტყვის, აზროვნებისა და გამოხატვის თავისუფლების ერთგვარი მოედანი - სივრცე, სადაც ნებისმიერი პოლიტიკური შეხედულების, რელიგიური მრწამსისა თუ სხვა რამ კუთვნილების ადამიანს შეუძლია აწარმოოს ბლოგი - გახდეს მებლოგე. და რომ ეს ასეა, ამაზე ჩვენი ძვირფასი ავტორების, როგორც ინდივიდების (Homo Politicus) მრავალფეროვნებაც მეტყველებს. ის ფაქტი, რომ ჩვენთან საკუთარ ნააზრევს აქვეყნებენ, მაგალითად, ულტრალიბერალი დავით უტეხი, მემარცხენე ანტონინ მარტო, კონსერვატორი მერაბ დოლიძე ან ზომიერი ალექს ჩიქოვანი, სიამაყით გვავსებს და გვიმძაფრებს განცდას, რომ სწორ გზაზე ვდგავართ.

შემდეგ გაჩნდა იდეა, რომ ახალგაზრდებისათვისაც გაგვეხსნა რაიმე ისეთი სივრცე, სადაც ისინი შეძლებდნენ უფრო მეტი ეთქვათ საკუთარ ყოველდღიურობასა თუ განცდებზე, ვიდრე ამის შესაძლებლობებს სხვა და სხვა სოციალური ქსელი იძლევა.

ამის საუკეთესო საშუალებად ღია ელექტრონული დღიურების ქსელი მივიჩნიეთ, თუმცა, საბოლოო ჯამში, ის უფრო მეტი (თუ კი შეიძლება ასე ითქვას) აღმოჩნდა, ვიდრე ვვარაუდობდით - ავტორთა შორის ნახავთ არა მხოლოდ ახალგაზრდებს, არამედ ზრდასრულ ადამიანებსაც. ანუ საკუთარი ამბებისა თუ განცდების ღიად მოყოლის სურვილი არა მხოლოდ საზოგადოებრივ ასპარეზზე ახლადგამოსულ ადამიანებს გაუჩნდათ, არამედ მათაც, ვინც უკვე საკმაო ხანია თავი დაიმკვიდრა...

და, შესაძლოა, ყოველდღიური რუტინით გადაქანცულთ უფრო ესაჭიროებოდათ ასეთი სივრცე.